Sumqayıt şəhərindəki Heydər Əliyev Mərkəzində Zəfər Gününə həsr olunmuş “Zəfərin Rəngi” adlı tədbir keçirilib.
AZƏRTAC xəbər verir ki, əvvəlcə Ulu Öndər Heydər Əliyevin və şəhidlərimizin əziz xatirəsi bir dəqiqəlik sükut elan edilib. Daha sonra Sumqayıt şəhərindəki Səid Rüstəmov adına 3 nömrəli Uşaq İncəsənət Məktəbinin xor kollektivinin və ansamblın ifasında Dövlət Himni səsləndirilib.
Milli Məclisin deputatı Səbinə Salmanovanın təşəbbüsü ilə keçirilən tədbirdə 44 günlük Vətən müharibəsində Azərbaycan Ordusunun qəhrəmanlıq səhnələrinin, azad edilmiş şəhər və kəndlərin görüntülərinin, eləcə də şəhidlərin xatirəsinin əbədiləşdirilməsinin əks olunduğu videoçarx nümayiş etdirilib.
Tədbir çərçivəsində gənc rəssam Emin Aslanovun “44 Zəfər Plakatı” adlı sərginin açılışı olub.
Toplantıda çıxış edən Milli Məclisin deputatı Səbinə Salmanova qeyd edib ki, Vətən müharibəsi Azərbaycan tarixinin ən şanlı səhifələrindən biridir. O, bildirib ki, sərgidə təqdim olunan bütün rəsmlər Sumqayıt şəhər məktəblərinə hədiyyə ediləcək.
Azərbaycanın Milli Qəhrəmanı, şəhid general-mayor Polad Həşimovun anası Səmayə Həşimova çıxışında Azərbaycan Ordusunun şücaətindən bəhs edib.
Milli Məclisin deputatları Hikmət Babaoğlu, Pərvin Kərimzadə və Rizvan Nəbiyev qeyd ediblər ki, 8 Noyabr – Zəfər Günü xalqımızın əzmi, birliyi və dövlətimizin qətiyyətli iradəsi nəticəsində əldə edilmiş tarixi qələbənin rəmzidir.
Sumqayıt şəhər İcra hakimiyyətinin başçısı Zakir Fərəcov isə Zəfər Gününü Azərbaycan xalqının qürur və şərəf səhifəsi kimi dəyərləndirib.
Sonra tədbir bədii hissə ilə davam etdirilib.