ABŞ Federal Ehtiyat Sisteminin (Mərkəzi Bankın funksiyalarını yerinə yetirən FRS) Rəhbərlər Şurası vəzifəsinə namizəd, Ağ Evin İqtisadi Məsləhətçilər Şurasının rəhbəri Stiven Miran prezident Donald Trampdan müstəqil qalacağını bildirib.
ABŞ Senatının Bank Komitəsində onun namizədliyi ilə bağlı dinləmələrdə Demokratlar Partiyasının nümayəndələri Miranın öz mövqeyini nəzərə alaraq, FED-də Amerika administrasiyası rəhbərinin maraqlarını təşviq edəcəyindən narahat olduqlarını bildiriblər. Xüsusilə senator Cek Rid (Rod-Aylenddən olan demokrat) Miranın namizədliyi təsdiq olunarsa, Ağ Evdəki vəzifəsindən istefa verməyəcəyini, sadəcə olaraq məcburi məzuniyyətə gedəcəyini, əslində “prezidentin tabeliyində” qalmasını qəzəbli adlandırıb. Bu, onun fikrincə, FED-in müstəqilliyinə xələl gətirir.
Senator Elizabet Uorren (D-Mass.) öz növbəsində Miranı “Trampın kuklası” adlandırıb və “nə Amerika xalqı, nə investorlar, nə də qlobal maliyyə bazarları onun müstəqilliyinə inanmır” fikrini bildirib. Rid öz növbəsində Mirandan özünü “Tramp kuklası” hesab edib-etmədiyini soruşub. “Qətiyyən yox. Mən son dərəcə müstəqiləm”, – deyən Miran cavabında bildirib ki, namizədliyi təsdiqlənərsə, o da “müstəqilliyini qoruyub saxlamaq” niyyətindədir.
Miran, “Fed-də təsdiq olunarsa, iqtisadi göstəricilər, inflyasiya, məşğulluq məlumatları və iqtisadi siyasətlərin təsiri ilə bağlı öz təhlilimə əsaslanaraq müstəqil şəkildə hərəkət edəcəyəm” deyib.
Avqustun əvvəlində Tramp Mirana Federal Ehtiyatlar Sisteminin Rəhbərlər Şurasındakı boş yeri müvəqqəti olaraq doldurmağı təklif edib. Amerika liderinin yazdığı kimi, Miran təsdiq olunarsa, o, 2026-cı il yanvarın 31-dək bu vəzifəni tutacaq: “Həmin müddət ərzində biz daimi əvəz axtarmağa davam edəcəyik”, – Tramp izah edib. (Tass)