ABŞ prezidenti Donald Tramp bir sıra liderlərlə görüşü zamanı İsrailin İordan çayının qərb sahilini ilhaqına icazə verməyəcəyini bəyan edib. Bu barədə Amerikanın “Politico” qəzeti məlumat yayıb.
Onun mənbələrinə görə, Tramp sentyabrın 23-də bir sıra ərəb və müsəlman ölkələrinin liderlərinə “İsrailin baş naziri Binyamin Netanyahunun İordan çayının qərb sahilini ilhaqına icazə verməyəcəyini” vəd edib.
Sözügedən görüş BMT Baş Assambleyasının Nyu-Yorkda keçirilən 80-ci sessiyası çərçivəsində baş tutub. Tədbirdə Misir, İndoneziya, İordaniya, Qətər, BƏƏ, Pakistan, Səudiyyə Ərəbistanı və Türkiyə liderləri iştirak ediblər. “Politico” mənbələrinin məlumatına görə, iştirakçılardan bəziləri Trampa “İsrailin İordan çayının qərb sahilinə hər hansı işğalının çox güman ki, İbrahim razılaşmalarının dağılmasına gətirib çıxaracağını” başa salmaq istəyib.
Axios bu ayın əvvəlində Netanyahunun Trampın İordan çayının qərb sahilini zəbt etmək üçün razılığını istədiyini bildirdi. Nəşrin mənbələrinə görə, Qüdsdə keçirilən görüşdə baş nazir ABŞ dövlət katibi Marko Rubioya Fələstin Milli Administrasiyasının fəaliyyət göstərdiyi əraziləri ələ keçirmək üçün müxtəlif variantları nəzərdən keçirdiyini bildirib.