Avqustun 8-də Vaşinqtonda sülh sazişinin paraflanmasından sonra Ermənistan hakimiyyəti Azərbaycanla sülh prosesini müsbət qiymətləndirir.Bu barədə jurnalistlərə Ermənistan xarici işlər nazirinin müavini Vahan Kostanyan bildirib.
Ermənistanın keçmiş prezidenti Robert Köçəryanın (1998-2008-ci illər) avqustun 8-də Vaşinqton görüşü nəticəsində Ermənistanın problemdən başqa heç nə almadığı barədə bəyanatını şərh etmək xahişinə cavab olaraq Kostanyan bəyan edib ki, Ermənistan sülh və sabit Cənubi Qafqaz yaratmaq imkanı əldə edib və bu prosesə başlayıb.
“Biz hazırda amerikalı tərəfdaşlarımızla müzakirə olunan bütün regional kommunikasiyaları blokdan çıxara bilmişik. Biz prosesin müsbət inkişaf edəcəyinə ümid edirik və əminik. Bütövlükdə, avqustun 8-də Vaşinqtonda keçirilən görüşdən sonra müşahidə etdiyimiz sürəti müsbət qiymətləndiririk”, – Ermənistan xarici işlər nazirinin müavini Vahan Kostanyan cümə axşamı brifinqdə bildirib. O, əmin edib ki, Ağ Evdəki görüşdən sonra verilən bəyanatlar regionun sabit və sülh dövrünə qədəm qoyduğunu göstərir.
O, həmçinin İrəvanın Azərbaycanla tezliklə sülh müqaviləsi imzalamağa hazır olduğunu bir daha vurğulayıb. (Tass)