Azərbaycan Prezidenti İlham Əliyev və Rusiya Prezidenti Vladimir Putin arasında Düşənbədə keçirilmiş görüş böyük əhəmiyyət kəsb edir. Prezident Putinin verdiyi bəyanatlardan aydın olur ki, ötən ilin dekabrında “Azərbaycan Hava Yolları”na məxsus təyyarənin Rusiya hava məkanında vurulması ilə bağlı ortaya çıxmış məsələlərin həlli üçün Rusiya tərəfi müvafiq addımlar atmaq qərarına gəlib. Hesab etmək olar ki, artıq ikitərəfli münasibətlərin qaydaya salınması qarşısında hər hansı maneə qalmayıb.
Bu sözləri AZƏRTAC-a açıqlamasında Milli Məclisin Azərbaycan-Rusiya parlamentlərarası əlaqələr üzrə işçi qrupunun üzvü Qaya Məmmədov söyləyib.
Onun fikrincə, Azərbaycan ilə Rusiya arasında ikitərəfli münasibətlərin bundan sonrakı inkişafı üçün böyük potensial mövcuddur. “Bu münasibətlərin proqnozlaşdırıla bilən, sabit və dinamik olması hər iki xalqın marağına xidmət edir. İnanırıq ki, Düşənbə şəhərində keçirilmiş görüşdə əldə edilmiş anlaşma qarşılıqlı maraq doğuran məsələlər üzrə əməkdaşlıq münasibətlərinin irəlilədilməsinə təkan verəcək”, – deyə Qaya Məmmədov vurğulayıb.