BƏƏ-nin milli təhlükəsizlik müşaviri Şeyx Təhnun bin Zayed Əl Nəhyan ABŞ prezidenti Donald Trampın xüsusi elçisi Stiven Vitkoff və kürəkəni Jared Kuşnerlə atəşkəsin əldə olunmasından sonra Qəzza zolağındakı vəziyyəti müzakirə edib, WAM Emirates xəbər agentliyi bildirib.
İki ölkə nümayəndələri arasında danışıqlar Vitkoff və Kuşnerin İsrailə səfərini başa vurduqdan sonra Əbu-Dabidə baş tutub. Agentliyin məlumatına görə, görüş iştirakçıları ABŞ-ın “prezident Donald Trampın planı çərçivəsində əldə edilmiş razılaşmanın möhkəmlənməsini təmin etmək” üçün göstərdiyi səyləri də müzakirə ediblər.
Oktyabrın 6-da İsrail və HƏMAS nümayəndə heyətləri Misir, Qətər, ABŞ və Türkiyənin vasitəçiliyi ilə Qəzza zolağında münaqişənin həlli üçün dolayı danışıqları bərpa ediblər. Oktyabrın 9-da tərəflər ABŞ prezidenti Donald Trampın əvvəllər təqdim etdiyi sülh planının birinci mərhələsinin həyata keçirilməsinə dair saziş imzalayıblar. Qəzzada atəşkəs razılaşması oktyabrın 10-da qüvvəyə minib.