Yaxın Şərqdə təhlükəsizliyin təmin edilməsi və qorunması üçün məsuliyyət regiondakı bütün ölkələrin üzərinə düşür və onlar əməkdaşlığı gücləndirməlidirlər. Misir Prezidenti Əbdülfəttah əs-Sisi bu əminliyi ifadə edib.
Misir lideri Qahirədə türkiyəli həmkarı Rəcəb Tayyib Ərdoğanla keçirdiyi mətbuat konfransında vurğulayıb ki, “Regionda təhlükəsizlik və sabitlik bütün ölkələrin kollektiv məsuliyyətidir. Çoxsaylı böhranların həlli üçün əməkdaşlığımızı dərinləşdirməliyik”. Sisinin çıxışları onun ofisi tərəfindən yayımlanıb. Misir prezidenti həmçinin qeyd edib ki, bu baxımdan o və Ərdoğan “region ölkələrinin daxili işlərinə qarışmamaq zərurətini” müzakirə ediblər.
Regional məsələlərlə yanaşı, tərəflər ikitərəfli münasibətləri də müzakirə edib və hərbi əməkdaşlıq da daxil olmaqla müxtəlif sahələrdə əməkdaşlıq haqqında bir neçə sənəd imzalayıblar. Misir-Türkiyə Yüksək Səviyyəli Əməkdaşlıq Şurasının ikinci iclası da Qahirədə keçirilib və nəticədə ölkələr arasında əməkdaşlığın gücləndirilməsini elan edən kommünike imzalanıb. (Tass)