Meksika Qəzza Sülh Şurasının ilk iclasında müşahidəçi kimi iştirak edəcək, lakin Fələstinin iştirak etməməsi səbəbindən qrupa qoşulmayacaq. Bu barədə Meksika prezidenti Klaudiya Şeynbaum məlumat verib.
“Biz açılan istənilən platformada sülh axtarışını qəbul edirik, lakin bu halda, Yaxın Şərqdə sülh məsələsinə gəldikdə hər iki dövlətin – İsrail və Fələstinin – iştirakı vacibdir və bu formatda bu nəzərdə tutulmayıb”, – dövlət başçısı gündəlik mətbuat konfransında bildirib.
Şeynbaum qeyd edib ki, Meksika Fələstini rəsmi olaraq dövlət kimi tanıdığı üçün onun danışıqlar masasında olmaması Meksika nümayəndə heyətinin tam iştirakını qeyri-mümkün edir. Prezident aydınlıq gətirib ki, “müşahidəçi kimi getməyimiz təklif olunur, ona görə də BMT-dəki səfirimiz çox güman ki, gedəcək”.