Polşa hökumətinin sözçüsü Adam Şlapka Polşa prezidenti Karol Navrotskini nüvə silahları mövzusunda verdiyi açıqlamalarda daha diqqətli olmağa çağırıb.
Şlapka Polşa kabinetinin sosial media hesablarında yayımlanan mətbuat konfransında bildirib ki, “Bu cür bütün ictimai bəyanatlar son dərəcə ehtiyatla verilməli və Polşanın beynəlxalq öhdəlikləri nəzərə alınmaqla diqqətlə nəzərdən keçirilməlidir”. Hökumət sözçüsü qeyd edib ki, Navrotski açıqlaması ilə bağlı kabinetlə məsləhətləşməyib. Şlapka həmçinin nüvə proqramı kimi məsələlərlə bağlı qərarların prezident tərəfindən deyil, Nazirlər Şurası tərəfindən verildiyini təkrarlayıb.
Fevralın 15-də Navrotski Polsat televiziyasına verdiyi müsahibədə Polşanın nüvə silahına çıxış əldə etməyə çalışmalı olduğunu bildirib. Polşa xarici işlər naziri Radoslav Sikorski isə öz növbəsində Polşa hakimiyyətinin belə bir ehtimalı müzakirə etmədiyini vurğulayıb. (Tass)