Suriya hakimiyyəti İsrailin təhdidlərinə baxmayaraq, onunla “sakit və sabit” münasibətlər qurmağa ümid edir. Bu barədə Suriyanın xarici işlər naziri Əsəd əl-Şeybani bildirib.
“Son bir il yarımdır ki, İsraildən gələn təhdidlərlə üzləşirik. Suriyanın yenidən qurulmasına və suriyalıların ölkəyə qayıtması üçün təhlükəsiz mühit yaratmağa diqqət yetirmək istədiyimiz üçün İsraillə sakit və sabit münasibətlər qurmağa ümid edirik”, – deyə o, BƏƏ-nin ” The National” qəzetinin müxbirinin sualına cavab olaraq bildirib.
Nazir əlavə edib ki, ABŞ-ın vasitəçiliyi ilə aparılan danışıqlarda əhəmiyyətli nəticələr əldə olunmasa da, İsrail ilə münasibətlər qurmağa ümid edir. Suriya xarici işlər naziri həmçinin 1974-cü ildə başlayan iki ölkə sərhədində BMT-nin rəhbərlik etdiyi missiyanın bərpasına çağırıb. Daha əvvəl Suriya prezidenti Əhməd əl-Şaraa da İsrail ilə münasibətlərin normallaşdırılması və təhlükəsizlik sazişinin bağlanması ilə bağlı danışıqların çıxılmaz vəziyyətdə olmadığını, əksinə, ciddi çətinliklərlə davam etdiyini etiraf etmişdi.
Fevralın 14-də Münhen Təhlükəsizlik Konfransında çıxış edən Suriya xarici işlər naziri işğalçı qüvvələrin davam edən basqınlarının suriyalıların həyatını təhlükəyə atdığını və bütün regionu qeyri-sabitləşdirdiyini bildirib. O, əlavə edib ki, Dəməşq İsrailin hərəkətlərini baş verən bir hadisə kimi qəbul edə bilməz. (Tass)