Şuşa Bəyannaməsi müasir dövrdə Azərbaycan-Türkiyə münasibətlərinə dair ən mühüm siyasi və hüquqi sənədlərindən biri kimi tarixə düşüb.

Bunu “Report”a Müdafiə, təhlükəsizlik və korrupsiya ilə mübarizə komitəsinin üzvü, deputat Səbinə Salmanova “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi”nin imzalanmasının beşinci ildönümü ilə bağlı deyib.

Onun fikrincə, bu sənəd təkcə iki qardaş dövlət arasında münasibətlərin yeni mərhələyə yüksəldiyini təsdiqləməyib, eyni zamanda regionun gələcək inkişaf istiqamətlərini müəyyən edən strateji yol xəritəsinə çevrilib.

Deputat xaatırladıb ki, Azərbaycan-Türkiyə əlaqələri tarixə, eyni soykökə bağlılığa, dostluq və qardaşlıq prinsiplərinə əsaslanır:

“Ulu Öndər Heydər Əliyevin əbədiyyətə qədər yaşayacaq “Bir millət, iki dövlət” kəlamı münasibətlərimizin əsasında dayanır. Bu gün Prezident İlham Əliyev və Türkiyə Prezidenti Rəcəb Tayyib Ərdoğanın nümayiş etdirdikləri qətiyyətli siyasi iradə nəticəsində Azərbaycan-Türkiyə əlaqələri özünün ən yüksək inkişaf mərhələsini yaşayır”.

 O bəyan edib ki, məhz bu baxımdan Şuşa Bəyannaməsi Azərbaycan ilə Türkiyə arasında indiyədək imzalanmış çoxsaylı sənədlər arasında xüsusi yer tutur.

“Bu sənəd iki ölkə arasında mövcud olan strateji tərəfdaşlığı hüquqi baxımdan daha da möhkəmləndirərək müttəfiqlik səviyyəsinə yüksəldib. Əslində Şuşa Bəyannaməsi iki dövlətin ortaq gələcəyinə dair siyasi iradəsinin, qarşılıqlı etimadının və qardaşlıq münasibətlərinin rəsmi ifadəsidir”.

S.Salmanova vurğulayıb ki, Şuşa Bəyannaməsinin mühüm əhəmiyyəti həm də ondan ibarətdir ki, bu sənəd regionda yeni geosiyasi reallıqlar fonunda təhlükəsizlik və əməkdaşlıq mühitinin formalaşmasına töhfə verir:

“Bu gün hər iki dövlət regional sabitliyin, iqtisadi əməkdaşlığın və davamlı inkişafın əsas təminatçılarından biri kimi çıxış edir. Şuşa Bəyannaməsi enerji təhlükəsizliyi, nəqliyyat-kommunikasiya əlaqələrinin inkişafı və beynəlxalq layihələrin həyata keçirilməsi baxımından da mühüm əhəmiyyətə malikdir. Azərbaycanın və Türkiyənin birgə təşəbbüsü ilə reallaşdırılan enerji və nəqliyyat layihələri artıq Avrasiyanın iqtisadi xəritəsini dəyişdirən əsas amillərdən birinə çevrilib. Bu baxımdan Şuşa Bəyannaməsi təkcə iki ölkənin deyil, daha geniş coğrafiyanın inkişafına xidmət edən strateji sənəd kimi dəyərləndirilə bilər”.