Almaniya, Fransa və Böyük Britaniya hərtərəfli və uzunmüddətli sazişin bağlanması məqsədi ilə İranın nüvə proqramı ilə bağlı danışıqları bərpa etməyə hazırdır. Bu barədə Aİ-3 ölkələrinin liderləri – Fridrix Merz, Emmanuel Makron və Key Starmer arasında danışıqların yekunları üzrə birgə bəyanatda bildirilib. Mətni Almaniya hökumətinin mətbuat xidməti yayıb.
Sənəddə deyilir: “Biz İranın heç vaxt nüvə silahı əldə etməməsini təmin edəcək hərtərəfli, davamlı və yoxlanıla bilən razılaşma əldə etmək üçün İran və ABŞ ilə danışıqları bərpa etməkdə qərarlıyıq”. Üç ölkənin liderləri eyni zamanda snapback mexanizminin (BMT Təhlükəsizlik Şurasının İrana qarşı sanksiyalarını bərpa edən) düzgün addım olduğuna inandıqlarını bildiriblər və bütün ölkələri Tehrana qarşı məhdudiyyətlərə əməl etməyə çağırıblar.