Almaniya Federal Enerji və Su Təsərrüfatı Assosiasiyası (BDEW) quraqlıq səbəbindən çayların qurumasına baxmayaraq, ölkədə enerji çatışmazlığının olmadığını düşünür.
Assosiasiyanın məlumatına görə, çay səviyyəsinin aşağı olması ayrı-ayrı elektrik stansiyalarının işinə təsir göstərə bilər, lakin hazırda elektrik və istilik təchizatı təhlükəsizdir. BDEW rəhbəri Kerstin Andreae DPA xəbər agentliyinə bildirib ki, “Almaniyada elektrik və istilik təchizatı hazırda təhlükəsizdir. Enerji bazarları da çatışmazlıq siqnalı vermir”. Bununla belə, o, əlavə edib ki, vəziyyət yaxından izlənilir.
BDEW rəhbərinin qeyd etdiyi kimi, külək və günəş enerjisi çayların aşağı səviyyələrindən birbaşa asılı olmadığı üçün mövcud vəziyyətdə şaxələndirilmiş generasiya qarışığı özünü doğruldur. Andreae qeyd etdi ki, “Xüsusilə günəş enerjisi istehsalı gündüz saatlarında tələbatın böyük bir hissəsini ödəyir”. O, enerji qarışığının artan istilik dalğalarına və quraqlığa daha davamlı olmalı olduğunu əlavə edib.
Quraqlıq səbəbindən hansı enerji sektorlarının ən böyük gərginliklə üzləşdiyindən danışan Andreae kömürlə işləyən enerji istehsalını xüsusi qeyd etdi. “Çaylar kömür təchizatı üçün xüsusilə vacibdir, çünki bir çox bölgələrdə bu, su ilə səmərəli şəkildə daşınır”, – deyə o vurğuladı. Suyun səviyyəsinin aşağı düşməsi səbəbindən gəmilər yalnız qismən yüklərlə işləyə bilir. Lazım gələrsə, yük maşını və ya dəmir yolu ilə alternativ nəqliyyat vasitələrindən istifadə etmək lazım gələcək. BDEW rəhbərinin sözlərinə görə, elektrik stansiyalarının mövcud şəraitdə normal işləmə qabiliyyəti konkret obyektdən asılıdır. (Tass)