Almaniya hökuməti Ukraynadakı münaqişənin həlli ilə bağlı Əbu-Dabidə danışıqların davam etdirilməsini alqışlayıb. Bu barədə jurnalistlərə Almaniya Nazirlər Kabinetinin sözçüsü Steffen Meyer bildirib.
Meyer, Almaniya hökumətinin Əbu-Dabidəki danışıqlardan gözləntiləri ilə bağlı suala cavab olaraq bildirib ki, “Prinsipcə, bu danışıqların hazırda davam etməsi yaxşıdır. Biz Ukraynanı dəstəkləyirik və bu prosesdə onu müşayiət edirik, çox sıx əlaqələndiririk”. Eyni zamanda, Almaniya hökumətinin nümayəndəsi vurğulayıb ki, Almaniya münaqişəyə “son qoymaq üçün Avropa və Amerika tərəfdaşları ilə intensiv işləməyə” davam edir.
Almaniya kansleri Fridrix Merzin cümə axşamı Əbu-Dabiyə səfəri zamanı hər hansı görüş planlaşdırıb-planlaşdırmadığı ilə bağlı suala Meyer cavab olaraq bildirib ki, Merzin səfəri digər məsələlərə, xüsusən də enerji əməkdaşlığının dərinləşdirilməsinə yönələcək. “Buna görə də Almaniya kanslerinin bu danışıqlarda şəxsən iştirak edəcəyini gözləmirəm. Amma artıq dediyim kimi, biz müxtəlif kanallar vasitəsilə prosesdə çox yaxından iştirak edirik”, – deyə Almaniya Nazirlər Kabinetinin sözçüsü yekunlaşdırıb.