ABŞ administrasiyası Vaşinqtonun İranla hərbi əməliyyatların bərpası və ya razılaşma olmadan dondurulmuş qarşıdurmaya cəlb olunmaq riskindən narahatdır. Bu barədə Amerika rəsmiləri Axios-a bildiriblər.
Onların sözlərinə görə, münaqişənin nə hərbi, nə də diplomatik həllinin tapılmayacağı və ABŞ-ın İranın dəniz blokadasını davam etdirərək uzun müddət bölgədə əhəmiyyətli qüvvələr saxlamalı olacağı ilə bağlı narahatlıqlar var. Eyni zamanda, hər iki tərəf digərinin hərəkətlərini yaxından izləyəcək, onların ya zərbə endirəcəyini, ya da ehtiyatlarını itirəcəyini gözləyəcək. Bir mənbəyə görə, bu ssenari 3 noyabr 2026-cı ildə ABŞ-da keçiriləcək ara seçkilər yaxınlaşdıqca “[ABŞ Prezidenti Donald] Trampın başına siyasi və iqtisadi cəhətdən gələ biləcək ən pis şeydir”.
Trampın müşavirləri Axios-a bildiriblər ki, Amerika lideri əlavə zərbələr endirməklə İrana tətbiq edilən iqtisadi tədbirlərin maksimum təsirini gözləmək arasında tərəddüd edir. Bu tədbirlər Tehranı, o cümlədən nüvə proqramı ilə bağlı güzəştlərə getməyə vadar edə bilər. Müşavirlərdən birinin sözlərinə görə, Tramp ona deyib ki, “[İran rəhbərliyinin] başa düşdüyü tək şey bombardman etməkdir”. Mənbə Trampın hazırkı vəziyyətini “məyus realist” kimi təsvir edib. “O, güc tətbiq etmək istəmir, amma geri çəkilməyəcək”, – deyə o bildirib.
Axios-un məlumatına görə, Tramp bazar ertəsi günü milli təhlükəsizlik komandası ilə İranın yeni danışıqlar raundu təklifini müzakirə edib, lakin heç bir qərar qəbul edilməyib. (Tass)