Azərbaycanda maliyyə lizinqi, maliyyə icarəsi şirkətlərinin yaranması və belə bir xidmətin genişləndirilməsi bir məqsəd deyil.
“Report” xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin iclasında deputat Azər Əmiraslanov bildirib.
“Bu, ilk növbədə alternativ maliyyə mexanizminin yaradılması imkanıdır. Bu gün ən aktual məsələ iqtisadi artımın maliyyələşdirilməsi, sahibkarlıq üçün investisiya imkanlarının və maliyyə resurslarının əlçatanlığıdır. Bu, alternativ maliyyələşmə mexanizmi kimi məhz həmin hədəflərə nail olmağımıza imkan verir”, – deyə o qeyd edib.
Deputatın sözlərinə görə, maliyyə lizinqi şirkətləri dünyada geniş yayılıb və o, maliyyə bazarının əsas subyekti hesab olunur: “Buna görə də Azərbaycan Mərkəzi Bankının məhz belə bir layihə hazırlaması təsadüfi deyil. Bank maliyyə bazarının əsas tənzimləyicisidir və bu cür şirkətlər də maliyyə bazarının subyekti kimi bu bazara daxil olur. Məhz bu baxımdan hesab edirik ki, alternativ maliyyələşmə mexanizmi kimi bu qurumların gələcəkdə çox böyük əhəmiyyəti olacaq. Həm də bu, bir növ fundamental maliyyə vasitəçiliyi alətidir. Çünki bir tərəfdən, sərbəst pul vəsaitləri yaranır, digər tərəfdən isə vəsaitə ehtiyacı olan sahibkarlıq qurumları, bu vəsaitə ehtiyacı olan subyektlər məhz maliyyə lizinqi şirkətləri də bu vasitəçilik vasitəsilə həm bir tərəfdən pul kütləsini tənzimləyir, digər bir tərəfdən də iqtisadiyyatın maliyyə vəsaitlərinə olan ehtiyacını ödəyir”.