Azərbaycan Elm Fondu tərəfindən maliyyələşdirilən elmi layihələrin nəticələrinin praktik tətbiqi və kommersiyalaşdırılması, həmçinin Azərbaycan alimlərinin beynəlxalq elmi əməkdaşlığının genişləndirilməsi istiqamətində ardıcıl tədbirlər həyata keçirilir.
Fonddan AZƏRTAC-ın sorğusuna cavabında bildirilib ki, maliyyələşdirilən layihələrin yalnız fundamental elmi nəticələr əldə etməsi deyil, eyni zamanda, tətbiqi əhəmiyyət daşıması prioritet məsələlərdəndir. Layihələrin qiymətləndirilməsi zamanı onların innovativliyi, tətbiq imkanları və sosial-iqtisadi faydası nəzərə alınır. Xüsusilə layihələrin istehsalat, sənaye, kənd təsərrüfatı, səhiyyə və digər sahələrdə tətbiqinə üstünlük verilir. Eyni zamanda, innovativ məhsul və texnologiyaların yaradılmasına yönəlmiş layihələr dəstəklənməklə elmi nəticələrin kommersiyalaşdırılması üçün əlverişli mühit formalaşdırılır.
Azərbaycan Elm Fondu beynəlxalq elmi əməkdaşlığın inkişafına xüsusi önəm verir. Fond müxtəlif ölkələrin müvafiq elmi qurumları və beynəlxalq təşkilatlarla əməkdaşlıq çərçivəsində birgə qrant müsabiqələri keçirir. Hazırda Türkiyənin TÜBİTAK təşkilatı ilə birgə qrant proqramı uğurla reallaşdırılır. Bundan əlavə, Fond alimlərin beynəlxalq konsorsiumlarda iştirakını, xarici tərəfdaşlarla birgə tədqiqat layihələrinin hazırlanmasını və beynəlxalq elmi əlaqələrin genişləndirilməsini dəstəkləyir. Bu təşəbbüslər Azərbaycan alimlərinin beynəlxalq elmi məkana inteqrasiyasına və ölkənin elmi potensialının tanıdılmasına xidmət edir.