Azərbaycan Respublikasının Elm və Təhsil Nazirliyi yanında Elm və Ali Təhsil üzrə Dövlət Agentliyi ilə Özbəkistan Respublikasının Ali Təhsil, Elm və İnnovasiyalar Nazirliyinin tabeliyində fəaliyyət göstərən İnnovativ İnkişaf Agentliyi arasında elmi əməkdaşlıq çərçivəsində Azərbaycan və Özbəkistan alimləri üçün birgə elm müsabiqəsi elan edilib.
Agentlikdən AZƏRTAC-a bildirilib ki, müsabiqə çərçivəsində energetika, neft-kimya və materialşünaslıq, kənd təsərrüfatı və biotexnologiya, informasiya texnologiyaları, süni intellekt və rəqəmsal transformasiya, ekologiya və ətraf mühitin mühafizəsi, iqlim dəyişikliyi və su ehtiyatlarının idarə olunması, memarlıq, tikinti, dizayn və şəhərsalma elmləri, farmakologiya və əczaçılıq elmləri istiqamətləri üzrə birgə elmi layihələrin qəbulu həyata keçiriləcək.
Müsabiqədə iştirak etmək istəyən alimlər layihənin icrası məqsədilə qarşı ölkədən tərəfdaş müəyyən etməli və hər iki ölkənin müsabiqə şərtlərinə uyğun olaraq eyni mövzu üzrə birgə elmi layihə təqdim etməlidirlər. Müsabiqənin bütün mərhələlərində yalnız hər iki tərəfin müsbət rəyini almış layihələr növbəti mərhələyə buraxılacaq.
Azərbaycan tərəfi üzrə elmi layihələrin qəbulu martın 15-dək aparılacaq. Layihələr müvafiq forma doldurulmaqla science@eatda.edu.az elektron poçt ünvanına göndərilməlidir.
Müsabiqə ilə bağlı ətraflı məlumatla buradan tanış bilərsiniz.