“Nine Senses” İncəsənət Mərkəzində Azərbaycan əsilli amerikalı rəssam Vüqar Quliyevin “Dönüş nöqtəsi” adlı fərdi sərgisinin açılışı olub. Sərginin kuratoru Sofiya Frank olub.
AZƏRTAC xəbər verir ki, sərgi martın 21-dək davam edəcək. Sərgidə Vüqar Quliyevin 10 rəsmi nümayiş olunur. Qeyd edək ki, bu sərgidəki əsərlərin əksəriyyəti ilk dəfə ictimaiyyətə nümayiş olunur.
Rəssam hadisələrin qavrayışının zamanla necə dəyişdiyini araşdırır. Bu sərgidəki hər bir rəsm əsəri, yaddaşda canlandırılan və yenidən düşünülən, lakin unudulmayan, vizuallaşdırılmış geri dönüşü olmayan bir nöqtədir.
Çoxqatlı texnikalardan, rəng kontrastından və nöqtələrin ritmindən istifadə edərək Quliyev xatirələrimizdə zamanın izini təsvir edir. Onun əsərləri eyni zamanda həm salnamə, həm də düşüncədir. Onlar itkinin ağrısını, eyni zamanda daxilimizdəki müqəddəsliyin təzahürü olan bir işıq parıltısını ehtiva edir.
Vüqar Quliyev ABŞ-də yaşayan və işləyən, mükafatlara layiq görülən rəssamdır. O, 1984-cü ildə Azərbaycanda anadan olub, bədii karyerasına erkən uşaqlıqdan başlayıb. 1999-cu ildə Əzim Əzimzadə adına İncəsənət Kollecinə daxil olub. 2003-cü ildə təhsilini Azərbaycan Dövlət Rəssamlıq Akademiyasında davam etdirib.
Tələbəlik illərindən bəri Vüqar Quliyev Bakıda çoxsaylı sərgilərdə iştirak etmiş, tanınmış kurator Leyla Axundzadənin layihələrinə cəlb edilmiş, Cənubi Koreya, Almaniya və Fransada qrup sərgilərində iştirak etmişdir. 2016-cı ildə Parisdə fərdi sərgisi keçirilmişdir. Son bir neçə ildə rəssamın əsərləri ABŞ-nin müxtəlif qalereyalarında fəal şəkildə nümayiş etdirilir.