Balakən rayonunda oktyabrın 29-da keçiriləcək V Xurma festivalına hazırlıq işləri davam edir.
AZƏRTAC-ın bölgə müxbiri xəbər verir ki, Balakən Rayon İcra Hakimiyyətinin təşkilatçılığı, Kənd Təsərrüfatı və Mədəniyyət nazirliklərinin, Aqrar İnnovasiya Mərkəzinin və “Balkhoorma” şirkətinin dəstəyi ilə reallaşacaq festivalda xurmadan hazırlanmış geniş çeşiddə məhsullar, müxtəlif kompozisiyalar nümayiş olunacaq.
Festivalın təntənəli açılış mərasimi Ümummilli Lider Heydər Əliyevin adını daşıyan mədəniyyət və istirahət parkında reallaşacaq.
Festivala dəvət olunan qonaqlar əvvəlcə Ulu Öndərin parkda, dağüstü yüksəklikdə ucaldılmış abidəsi önünə gül dəstələri düzəcəklər. Sonra “Balxurma” MMC-nin rayonun Katex kəndində yerləşən meyvələrin quru və yarımquru emalı müəssisəsinə ekskursiya təşkil olunacaq və ərazidə xurma ağacları əkiləcək.
Festivalın rəsmi açılış mərasimindən sonra qonaqlar və rayon sakinləri parkda xurmadan hazırlanmış kompozisiyalara və kulinariya məhsullarına baxacaq, rayonda istehsal edilən kənd təsərrüfatı məhsullarının sərgiləri, həmçinin xurma tinglərinin və xurma məhsullarının satışı yarmarkası ilə tanış olacaqlar.
V Xurma festivalı konsert proqramı ilə başa çatacaq.