BMT-nin İnsan Hüquqları üzrə Ali Komissarı Volker Türk ABŞ və İran arasında əldə edilən sülh razılaşmasını alqışlayaraq, regiondakı münaqişələrin hərbi yolla həllinin mümkünsüzlüyünü vurğulayıb.
O, 7 iyula qədər Cenevrədə keçiriləcək BMT İnsan Hüquqları Şurasının 62-ci sessiyasının açılışında deyib: “ABŞ və İranın dərhal və daimi atəşkəsi, Hörmüz boğazının açılmasını və gələcək danışıqlar üçün çərçivənin yaradılmasını nəzərdə tutan sülh razılaşmasına çatdıqları barədə elanı alqışlayıram”.
Türkün sözlərinə görə, münaqişə “bölgədə və dünyada insan haqlarına dağıdıcı təsir göstərib”. O əlavə edib ki, “Son aylar göstərdi ki, bölgədəki dərin bölünmələr hərbi yolla həll edilə bilməz”.
Daha əvvəl ABŞ, İran və vasitəçi Pakistan rəsmiləri Vaşinqtonla Tehran arasında razılaşmanı təsdiqləyiblər. Sazişin iyunun 19-da Cenevrədə imzalanması planlaşdırılır. İran xarici işlər nazirinin müavini Kazem Qəribabadinin sözlərinə görə, 60 günlük atəşkəs zamanı tərəflər digər məsələlərlə yanaşı, Tehranın nüvə proqramını da müzakirə edəcəklər. İyunun 15-dən etibarən ABŞ İranın dəniz blokadasına son qoyacaq, Livan da daxil olmaqla bütün cəbhələrdə hərbi əməliyyatları dərhal və birdəfəlik dayandıracaq. (Tass)