Özbəkistan Xarici İşlər Nazirliyi 13 Özbəkistan vətəndaşının köləlikdə saxlanması ilə bağlı Ukrayna Xarici İşlər Nazirliyi və Baş Prokurorluğuna notalar göndərib. Bu barədə Özbəkistan Xarici İşlər Nazirliyinin mətbuat katibi Axror Burxanov məlumat verib.
Cümə günü Kiyev Vilayət Prokurorluğu bildirib ki, bir qrup şəxs əməyin istismarı məqsədilə Kiyev yaxınlığında 13 Özbəkistan vətəndaşını qeyri-insani şəraitdə saxlayıb. Qrupun 4 üzvü saxlanılıb və onlar xüsusilə ağır cinayətdə ittiham olunublar.
Bununla əlaqədar olaraq, respublikanın Ukraynadakı səfirliyinin əməkdaşları vəziyyəti araşdırmaq üçün hadisə yerinə gedib və vətəndaşlar yerli xəstəxanaya yerləşdirilib. “Səfirlik vətəndaşlarımızla bağlı vəziyyəti tam nəzarətə götürüb və onların Özbəkistana qayıtmasını təmin etmək üçün bütün lazımi tədbirləri görür. Konkret olaraq, Özbəkistan vətəndaşlarına konsulluq və hüquqi yardım göstərilməsi üçün Ukrayna Xarici İşlər Nazirliyinə və Baş Prokurorluğuna müvafiq notalar göndərilib”, – Burxanov Telegram-da yazıb.
Bundan əlavə, Özbəkistan Xarici İşlər Nazirliyi vətəndaşlarına Ukraynaya səfərdən çəkinməyi tövsiyə edir. “Ukraynada insan həyatı üçün təhlükə yarada biləcək hazırkı vəziyyətlə əlaqədar olaraq, biz Özbəkistan vətəndaşlarına öz təhlükəsizliklərini nəzərə alaraq, indiki vaxtda həmin ölkəyə səfər planlaşdırmamağı tövsiyə edirik”, – deyə Özbəkistan diplomatiyasının sözçüsü yekunlaşdırıb. (Tass)