Oktyabrın 20-də AMEA Nəsimi adına Dilçilik İnstitutunda “Konstitusiya və suverenlik” mövzusunda tədbir keçirilib.
İnstitutdan AZƏRTAC-a bildirilib ki, tədbiri açan müəssisənin direktoru professor Nadir Məmmədli Azərbaycan dövlətçiliyi tarixində Konstitusiyanın əhəmiyyətli yer tutduğunu vurğulayıb. Qeyd olunub ki, Konstitusiya hər bir dövlətin hüquqi əsasını təşkil edir. Müstəqillik, siyasi sabitlik və vətəndaş hüquq və azadlıqlarının təminatçısı kimi çıxış edir. Professor diqqətə çatdırıb ki, müasir müstəqil Azərbaycanın ilk Konstitusiyası məhz Ümummilli Lider Heydər Əliyevin uzaqgörən siyasəti nəticəsində qəbul edilib, ölkəmizin demokratik inkişaf yolu müəyyənləşdirilib.
Sonra dosent Elçin İsmayılovun “Suverenlik illərində Azərbaycan toponimlərinin tədqiqi”, dosent Təranə Şükürlünün “Suverenlik illərində mətbuat”, dosent Günel Mirzəyevanın “Suverenlik illərində Azərbaycan poeziyası”, elmi işçi Ayşən İsmayıllının “Suverenlik illərində (2020-2025) Qarabağ toponimlərinin araşdırılması” mövzularında məruzələri dinlənilib.
Alimlər Azərbaycan Respublikası Konstitusiyasının dövlət müstəqilliyinin möhkəmlənməsində, insan hüquq və azadlıqlarının təminatında mühüm rol oynadığını, suverenliyə gedən yolun məhz əsas qanundan və düzgün siyasi strategiyadan keçdiyini bir daha qeyd ediblər.