Əmək və Əhalinin Sosial Müdafiəsi Nazirliyi Sinqapurun “GovInsider” təşkilatının “İnnovasiya Mükafatları-2025” müsabiqəsində uğur qazanıb.
Bu barədə AZƏRTAC-a Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən məlumat verilib.
“İnnovasiyalar Konfransı-2025” tədbiri çərçivəsində keçirilən müsabiqədə əmək, məşğulluq, sosial müdafiə sahələrində elektron xidmətlərin geniş tətbiqinə görə nazirlik “Rəqəmsal Cəmiyyət Mükafatı” kateqoriyası üzrə xüsusi mükafata layiq görülüb. Artıq ikinci ildir ki, həmin müsabiqədə ölkəmiz mükafat qazanır.
Qeyd edək ki, “GovInsider” təşkilatı dövlət sektorunda innovasiyaları təşviq etmək üçün fəaliyyət göstərən geniş platformadır. Təşkilatın keçirdiyi budəfəki müsabiqədə 20 ölkədən 300 qurum iştirak edib.