Moskvaya rəsmi səfəri zamanı Ermənistan Parlamentinin sədri Alen Simonyan Rosatom Dövlət Korporasiyasının baş direktoru Aleksey Lixaçevlə qarşılıqlı maraq doğuran məsələləri müzakirə edib. Bu barədə Ermənistan Parlamentinin mətbuat xidməti məlumat yayıb.
“Fevralın 6-da Rusiya Federasiyasında rəsmi səfərdə olan Ermənistan Milli Assambleyasının (parlament ) sədri Alen Simonyan Rosatom Dövlət Korporasiyasının baş direktoru Aleksey Lixaçev ilə görüşüb. Tərəflər qarşılıqlı maraq doğuran məsələləri müzakirə ediblər”, – deyə bəyanatda bildirilir.
Fevralın 3-də Ermənistanın Ərazi İdarəetmə və İnfrastruktur naziri David Xudatyan ölkənin mövcud Metsamor AES-i əvəz edəcək gələcək atom elektrik stansiyasının (AES) növünə qərar verdiyini və modul dizayn seçdiyini açıqladı. Yerevan hazırda Rusiya, ABŞ, Çin, Cənubi Koreya və Fransanın təkliflərini nəzərdən keçirir.