“Report” xəbər verir ki, bu barədə “PASHA Financial Holding”in baş direktoru Fərid Məmmədov İslam İnkişaf Bankı (IsDB) Qrupunun Bakıda keçirilən illik toplantları çərçivəsindəki panel sessiyasında bildirib.
Onun sözlərinə görə, iri regional layihələrin maliyyələşdirilməsi üçün birgə kreditləşmə sxemlərindən səmərəli istifadə edilə bilər ki, bu zaman beynəlxalq maliyyə institutları zəmanət və risklərin sığortalanması mexanizmlərindən istifadə edərək yerli bankları layihələrə cəlb edirlər.
F.Məmmədov qeyd edib ki, bu cür alətlər Orta Dəhlizin və “yaşıl enerji dəhlizləri”nin inkişafı üzrə layihələrin icrasında milli maliyyə təşkilatlarının iştirakını stimullaşdıra bilər.
“PASHA Financial Holding”in rəhbəri, həmçinin kapital bazarlarının və sığorta sektorunun inkişafı vasitəsilə Azərbaycan Mərkəzi Bankı tərəfindən həyata keçirilən uzunmüddətli kapital mənbələrinin inkişafına dair tədbirlərin vacibliyini vurğulayıb.
Onun sözlərinə görə, bu cür resursların formalaşması həm milli, həm də transsərhəd infrastruktur layihələrinin maliyyələşdirilməsini genişləndirməyə imkan verəcək.