Türkiyənin xarici işlər naziri Hakan Fidan bildirib ki, ABŞ-ın Türkiyəyə qarşı tətbiq etdiyi CAATSA sanksiyalarının tezliklə ləğv olunacağını istisna etmir, çünki hər iki ölkənin hakimiyyəti bunu etmək üçün siyasi iradə nümayiş etdirib.
“Türkiyə və ABŞ liderləri bu sanksiyaların qaldırılmasını istəyirlər. ABŞ-la münasibətlərimiz müsbət inkişaf edir. Lakin illərdir Konqresdə həll olunmamış məsələlər də var və onlardan biri də CAATSA-dır. Hazırda bu, daim mənfi təsir və narahatlıq yaradan yeganə məsələdir. Həm Prezidentimiz Rəcəb Tayyib Ərdoğan, həm də [ABŞ Prezidenti] Donald Tramp onları ləğv etməyə qəti şəkildə sadiqdirlər. İki lider ötən ilin sentyabr ayında Vaşinqtonda görüşəndə bu məsələ ilə bağlı iradələrini ifadə etdilər. Nazirlərimizə bu məsələni həll etməyi tapşırdıq və ümumilikdə hər şey yaxşı gedir. Məsələ yaxın gələcəkdə həll edilə bilər”, – deyə o, CNN Türk- də bildirib.
Fidan həmçinin qeyd edib ki, Türkiyə əleyhinə məhdudiyyətlərin qaldırılması ilə bağlı danışıqlar sayəsində “son üç-dörd il ərzində bir çox ölkə tərəfindən Türkiyəyə qarşı tətbiq edilən demək olar ki, bütün sanksiyalar ləğv edilib”. CAATSA sanksiyalarının ləğvinin real perspektivlərinə gəldikdə, o qeyd edib ki, “bunun üçün ABŞ Konqresində hüquqi prosesin tamamlanması tələb olunur” və məhdudiyyətlərin faktiki olaraq qaldırılması həmişə məsələ ilə bağlı hüquqi qərarın qəbul edilməsi ilə tam üst-üstə düşmür. “Lakin inzibati cəhətdən ABŞ administrasiyası tərəfindən müvafiq iradənin həyata keçirilməsində heç bir problem yoxdur. Prosesin ABŞ Konqresində necə inkişaf edəcəyini görəcəyik”, – deyə o əlavə edib. (Tass)