Finlandiyanın xarici işlər naziri Elina Valtonen Moskva ilə Helsinki arasında gələcəkdə dialoqun bərpasına ümid etdiyini bildirib.
“Hazırda ölkələrimiz arasında dialoq yoxdur, lakin gələcəkdə onu bərpa etmək imkanı olsaydı, çox yaxşı olardı” Valtonen Qətərin “Əl-Cəzirə” telekanalına müsahibəsində deyib. O, əlavə edib ki, Rusiyanın Ukraynada xüsusi hərbi əməliyyatı başa çatana qədər respublika rəhbərliyi Moskva ilə “anlaşmaq üçün heç bir səbəb görmür”.
Nazir qeyd edib ki, iki ölkə arasında “siyasi yox, diplomatik münasibətlər” mövcuddur. O əlavə edib ki, Moskva və Helsinki cari məsələlərlə bağlı əlaqəni davam etdirir.
Apreldə Finlandiya prezidenti Alexander Stubb bəyan edib ki, ölkə Rusiya ilə siyasi səviyyədə münasibətləri bərpa etmək üçün “zehni olaraq hazırlaşmalıdır”. O, həmçinin aydınlaşdırıb ki, Moskva ilə təmasların perspektivləri Ukraynadakı münaqişəyə son qoyulmasından və ümumilikdə münasibətlərin bərpasına dair müzakirələrin aparılmasından asılıdır. (Tass)