Fransada apteklərin təxminən 90%-i hökumətin təklif etdiyi qənaət tədbirlərinə qarşı ümummilli tətil çərçivəsində bağlanıb. Bu barədə BFMTV telekanalı Əczaçılar Federasiyasının məlumatlarına istinadən məlumat yayıb.
“Ölkə üzrə demək olar ki, 10 aptekdən 9-u bağlanıb”, – telekanal təşkilatdan sitat gətirir.
Xüsusilə əczaçılar sentyabrın 1-dən qüvvəyə minən və səhiyyə xərclərini azaltmağa yönəlmiş generik dərmanlara kommersiya endirimlərinin azaldılmasına qarşıdırlar. Əczaçılıq birlikləri bu tədbirin apteklərin bağlanmasına və iş yerlərinin itirilməsinə səbəb ola biləcəyini bildirir.
Sentyabrın 18-də Fransada hökumətin təklif etdiyi qənaət tədbirlərinə etiraz olaraq ümummilli tətil keçirilir. Hakimiyyət ölkə daxilində nümayişlərə təxminən 900 min insanın qatılacağını gözləyir. Daxili İşlər Nazirliyi asayişi qorumaq üçün 80 mindən çox polis və jandarm, həmçinin zirehli texnika və pilotsuz təyyarələr yerləşdirir. (Tass)