Cəfər Cabbarlı adına Respublika Gənclər Kitabxanasında Azərbaycan dilçilik elminin görkəmli nümayəndəsi, filologiya elmləri doktoru, professor Buludxan Xəlilovun zəngin elmi irsini əhatə edən elektron məlumat bazası hazırlanaraq istifadəçilərə təqdim edilib.
Kitabxanadan AZƏRTAC-a bildirilib ki, elektron məlumat bazası alimin həyat və yaradıcılığını sistemli şəkildə təqdim etməklə yanaşı, onun çoxşaxəli elmi fəaliyyətini geniş oxucu auditoriyasına çatdırmaq məqsədilə hazırlanıb. Resursda professor Buludxan Xəlilovun həyat və fəaliyyəti, elmi yaradıcılığı, görkəmli şəxslərin onun haqqında söylədikləri dəyərli fikirlər yer alır. Elektron bazada görkəmli alimin müəllifi və tərtibçisi olduğu əsərləri, elmi məqalələri, müsahibələri, redaktə etdiyi, rəy və “Ön söz” yazdığı kitabların siyahısı təqdim olunur.
Kitabxana əməkdaşları tərəfindən hazırlanan bazada filologiya elmləri doktoru Almaz Ülvinin “Dilçilik elmimizin əfsanəsi – Buludxan Xəlilov”, şair, publisist Şəmsi Qocanın “Buludxan Xəlilov – Ağbaba ruhunun elmi vüqarı” kimi məqalələrin tam mətni yer alır.
Elektron bazada, həmçinin professorun dilçilik elminin müxtəlif istiqamətlərinə həsr olunmuş araşdırmaları, Azərbaycan dilinin inkişafına verdiyi töhfələr, elmi-pedaqoji fəaliyyəti və milli dilçilik məktəbinin formalaşmasındakı xidmətləri əks etdirilir.
“Professor Buludxan Xəlilov – 60” adlı elektron baza kitabxananın rəsmi saytında yerləşdirilib.