“Ölkə ərazisində meşə fondu və xüsusi mühafizə olunan təbiət ərazilərində baş verə biləcək yanğın hadisələrinə qarşı qabaqlayıcı tədbirlərin həyata keçirilməsi üzrə 2026–2030-cu illər üçün Birgə Fəaliyyət Planı”nın 36-cı bəndinin icrasının təmin edilməsi məqsədilə Goranboy Rayon İcra Hakimiyyəti və Fövqəladə Hallar Nazirliyinin Aran Regional Mərkəzinin birgə təşkilatçılığı ilə Goranboy rayonunun Aşağı Ağcakənd qəsəbəsində maarifləndirici tədbir keçirilib.
AZƏRTAC-ın bölgə müxbiri xəbər verir ki, tədbirdə meşə fondu və xüsusi mühafizə olunan təbiət ərazilərində yanğın təhlükəsizliyi qaydaları, yanğınların başvermə səbəbləri, onların qarşısının alınması istiqamətində görülməli tədbirlər, eləcə də yanğın zamanı davranış qaydaları barədə iştirakçılara ətraflı məlumat verilib.
Çıxış edənlər yay mövsümündə hava şəraitinin quraq keçməsi səbəbindən yanğın riskinin artdığını qeyd edərək, vətəndaşları meşə və yaşıllıq ərazilərində odla ehtiyatlı davranmağa, tonqal qalamamağa, siqaret kötüklərini ətrafa atmamağa və yanğın təhlükəsizliyi qaydalarına ciddi riayət etməyə çağırıblar.
Tədbirin sonunda iştirakçıların sualları cavablandırılaraq, yanğın təhlükəsizliyinə dair maarifləndirici materiallar paylanılıb və ətraf mühitin qorunmasının hər bir vətəndaşın məsuliyyəti olduğu vurğulanıb.