XI Bakı Beynəlxalq Kitab Sərgisi təkcə kitab təqdimatlarını deyil, həm də milli kimliyimizin tanıdılmasını özündə ehtiva edir. Sərgidə tariximiz, ədəbiyyatımız, Zəfərimiz və digər mövzular geniş şəkildə əksini tapıb.
Bunu AZƏRTAC-a açıqlamasında Milli Məclisin deputatı Hikmət Babaoğlu bildirib.
Deputat kitab sərgisini böyük kitab bayramı kimi qiymətləndirib. Onun sözlərinə görə, kitab elm mənbəyidir və bir millətin keçmişi ilə gələcəyi məhz kitablarla bağlıdır.
Hikmət Babaoğlu gənclərə çağırış edərək deyib:“Gənclər bu gün telefonu elm mənbəyi kimi görürlərsə, oxusunlar. Tarixə nəzər saldıqda görürük ki, kağız Avropaya gəldiyi dövrdə belə avropalılar məlumatları dəri üzərinə yazmağa davam edirdilər. Çünki məlumatların itmə və ya zədələnmə ehtimalı var idi və insanlar bilikləri qorumağın yollarını axtarırdılar. Biz kitabları yazırıqsa, onları arxivlərdə saxlamalı və gələcək nəsillərə ötürməliyik. Gənclərin əsas məqsədi bilgi əldə etmək olmalıdır. Kitab sevgidir, çünki indiki nəsil qazandığı nailiyyətləri məhz kitablar vasitəsilə əldə edib. Kitab insanın emosional yaddaşında iz qoyur, ona enerji və duyğu bəxş edir. Həm elektron vasitələrdən, həm də ənənəvi kitablardan mütaliə etmək vacibdir”.