“Report” xəbər verir ki, bunu Azərbaycan Prezidenti İlham Əliyev WUF13-ün rəsmi açılış mərasimində çıxış edərkən bildirib.
Onun sözlərinə görə, Qarabağda və Şərqi Zəngəzurda hazırda 85 min nəfər işləyir və yaşayır.
“İndi “Böyük Qayıdış” proqramı həyata keçirilir. Şəhər və kəndlərin baş planları hazırlanıb. Mən, əlbəttə, çoxlu rəqəmlər gətirə bilərəm, lakin yalnız ikisini qeyd edəcəyəm. Beş il ərzində artıq 70 kilometr tunel tikilib, daha beş tunel tikinti mərhələsindədir. 435 körpü tikilib, ümumilikdə isə 500 körpü planlaşdırılır. Və bütün bunlar elektrik stansiyalarının, su təchizatı sistemlərinin, su anbarlarının, evlərin, məktəblərin, xəstəxanaların, üç beynəlxalq hava limanının və dəmir yollarının tikintisi ilə yanaşı cəmi beş il ərzində edilib”, – prezident bildirib.
İlham Əliyev vurğulayıb ki, “öz torpağının əsl sahibləri yalnız dağıtmağa, məhv etməyə və əziyyət gətirməyə gələnlərdən fərqli olaraq məhz belə davranır”.
“Bu gün 85 mindən çox azərbaycanlı artıq əvvəllər işğal olunmuş ərazilərdə yaşayır. Onlar işləyir, yaşayır, oxuyur. Və onların məşğulluğunun təmin edilməsi də hökumətimizin ən mühüm vəzifələrindən biridir. Ona görə də binaların, mənzillərin və fərdi evlərin, məktəblərin və xəstəxanaların tikintisi ilə yanaşı, əlbəttə, minalardan təmizləmə işləri aparılmalıdır, lakin eyni zamanda biz iş yerləri haqqında da düşünməliyik. Bu rayonlarda artıq yaradılmış və hələ yaradılacaq çoxsaylı sənaye zonaları, şübhəsiz, öz fundamental hüquqlarından – öz torpağında yaşamaq hüququndan məhrum edilmiş yüz minlərlə insanın sürətli qayıdışına kömək edəcək”, – Azərbaycan prezidenti əlavə edib.