İran hakimiyyəti ABŞ-la nüvə proqramı ilə bağlı danışıqlara başlamaq üçün dondurulmuş 12 milyard dollarlıq aktivlərin azad edilməsini, dəniz blokadasının qaldırılmasını və neft satışına sanksiyaların dayandırılmasını tələb edir. Bu barədə Mehr xəbər agentliyi Tehran və Vaşinqton arasında memorandum layihəsinə istinadən məlumat yayıb.
Sənəddə qeyd olunur ki, İran və ABŞ 60 gün ərzində nüvə danışıqları aparacaq və nəticədə razılığa gəlinəcək, lakin nüvə dialoqu başlamazdan əvvəl Amerika hakimiyyəti İran nefti və neft məhsullarının satışına tətbiq edilən sanksiyaları dayandırmaq, əvvəlcə dondurulmuş 12 milyard dollarlıq aktivləri açmaq və dəniz blokadasını tamamilə ləğv etmək öhdəliyini götürür.
Memorandum layihəsinə əsasən, tərəflər 60 gün ərzində bütün əsas və ikinci dərəcəli sanksiyaların ləğvini, eləcə də BMT Təhlükəsizlik Şurası və Beynəlxalq Atom Enerjisi Agentliyinin (BAEA) İdarə Heyətinin qətnamələrinin ləğvini əhatə edən razılığa gəlməlidirlər. Bu müddət ərzində ABŞ İranın xaricdəki əlavə 12 milyard dollarlıq aktivlərinin dondurulmasını ləğv etmək öhdəliyini götürəcək. (Tass)