İraqın Mədəniyyət Nazirliyinin əsas mətbu orqanı olan “Uruk” qəzetində doktor Mutəzz Muhy Əbdülhəmidin “Molla Nəsrəddin qəzeti və satira” başlıqlı geniş məqaləsi dərc olunub.
AZƏRTAC xəbər verir ki, məqalədə müəllif satirik ədəbiyyatın cəmiyyətə təsirindən bəhs edir.
Bildirilir ki, satira yalnız gülüş doğuran janr deyil, həm də ictimai nöqsanların üzə çıxarılması, maarifləndirmə və sosial dəyişikliklərə təkan verən ciddi ədəbi ifadə vasitədir. Qeyd olunur ki, müxtəlif xalqlarda satira fərqli formalarda təzahür etsə də, onun əsas məqsədi cəmiyyətin problemlərinə işıq tutmaqdır.
Yazıda “Molla Nəsrəddin” jurnalının Azərbaycan və ümumilikdə Şərq dünyasında satirik mətbuatın inkişafında oynadığı mühüm rolu xüsusi vurğulanır. Bildirilir ki, jurnal XX əsrin əvvəllərində Cəlil Məmmədquluzadə tərəfindən təsis olunaraq cəmiyyətin aktual problemlərini sadə və anlaşıqlı dildə oxuculara çatdırıb.
Məqalədə qeyd edilir ki, jurnal dini fanatizm, savadsızlıq və sosial ədalətsizlik kimi məsələləri kəskin tənqid edib, təhsilin inkişafı, qadın hüquqlarının genişləndirilməsi və Qərb dəyərlərinə inteqrasiya ideyalarını təbliğ edib. Bu fəaliyyətinə görə nəşrin əməkdaşları tez-tez təzyiqlərlə üzləşiblər.
Müəllif vurğulayır ki, 1906–1931-ci illərdə Tiflis, Təbriz və Bakıda nəşr olunan jurnal geniş oxucu auditoriyası qazanıb və Azərbaycan mətbuatında yeni satirik məktəbin formalaşmasına gətirib çıxarıb.
Sonda qeyd olunur ki, bu gün də satira cəmiyyətin müxtəlif təbəqələri üçün təsirli ifadə vasitəsi olaraq qalır və ictimai fikrin formalaşmasında mühüm rol oynayır.