İsrail Müdafiə Qüvvələrinin (İMQ) Baş Qərargah rəisi general-leytenant Eyal Zamir Livan və İran istiqamətləri üzrə planları təsdiqlədiyini açıqlayıb.
Zamir Livanın cənubunda yerləşən İsrail qoşunlarına səfəri zamanı bildirib ki, “Dünən Baş Qərargah komandanlığı ilə birlikdə gələcək planları təsdiqlədim. Vəziyyətin davamlı qiymətləndirilməsini davam etdiririk və həm Livan, həm də İran üçün planları təsdiqləyirik”. Ordunun mətbuat xidməti Baş Qərargah rəisinin sözlərini yayıb.
Zamir əlavə edib ki, İsrail Müdafiə Qüvvələri “yüksək hazırlıq vəziyyətindədir”. “İsrail Hərbi Hava Qüvvələrinin təyyarələri silahlanıb və hazırlıqlıdır, hədəflər isə sistemlərinə yüklənib. Biz dərhal güclü zərbə endirmək üçün necə hərəkət edəcəyimizi bilirik”, – deyə İsrail Müdafiə Qüvvələrinin Baş Qərargah rəisi bildirib.
Zamir qeyd edib ki, İsrail Livanda “Hizbullaha zərbələr endirməyə davam edir”. O bildirib ki, İsrail qüvvələri hazırkı əməliyyatın başlanğıcından bəri 1700-dən çox silahlı Hizbullah radikalını öldürüb. (Tass)