Bu gün Kəlbəcər Şəhəri Günü çərçivəsində təşkil olunan sərgidə 44 foto nümayiş etdirilir. Bu fotoların yarısı Vətən müharibəsindən əvvəlki dövrlərə, digər yarısı isə Kəlbəcərdə aparılan quruculuq işlərinə, təbiətə və bölgəyə artıq qayıdan insanların həyatına həsr olunub.
Bunu AZƏRTAC-a açıqlamasında Azərbaycan Fotoqraflar Birliyinin təsisçilərindən biri Mirnaib Həsənoğlu bildirib. Onun sözlərinə görə, sərgidə təqdim olunan şəkillər Azərbaycan Fotoqraflar Birliyinin arxivindən seçilib və təxminən doqquz fotoqrafın işlərini əhatə edir. Birinci Qarabağ müharibəsindən əvvəl çəkilmiş ilk fotolar arasında Hüseyn Hüseynzadənin dağ silsiləsini əks etdirən çəkilişi, eləcə də 1984-cü ildə Asım Talıb tərəfindən lentə alınmış “Kəlbəcər ağsaqqalları və çörək bişirənlər” fotosu yer alır.
Sonrakı fotolar 1993-cü ildə Kəlbəcər əhalisinin məcburi köçkünlüyünü, 1994-cü ildə Ömər aşırımında gedən döyüş səhnələrini və ümumilikdə Kəlbəcərin həmin dövrünə aid müxtəlif kadrları əks etdirir.