Cammu və Kəşmirdə baş verən terror aktı və Yeni Dehlinin Pakistan vətəndaşlarına əvvəllər verilmiş vizaları ləğv etmək qərarından sonra 786 Pakistan vətəndaşı, o cümlədən 55 diplomat, onların ailələri və səfirliyin yardımçı heyəti Hindistanı tərk edib. Bu barədə PTI agentliyi rəsmi mənbəyə istinadən məlumat yayıb.
Həmçinin, aprelin 24-dən bəri 1465 hindistanlı, o cümlədən 25 diplomat və məmur Pakistandan Pəncabdakı beynəlxalq sərhəd keçid məntəqəsindən Hindistana keçib.
Pakistanın Yeni Dehlidəki səfirliyinin üç müdafiə müşaviri aprelin 23-də persona non-qrata elan edilib və Hindistanı tərk etmək üçün bir həftə vaxt verilib. Bu hərbi attaşelərin departamentinin 5 əməkdaşı da ölkəni tərk etməyə məcbur olub. Hindistan həmçinin İslamabaddakı Hindistan səfirliyindəki hərbi attaşesini geri çağırıb. (Tass)