Əvvəlcə yalnız AB-nin şərqindəki ölkələri əhatə etmək nəzərdə tutulan “dron divarı” layihəsi bütün Avropanı əhatə edəcək şəkildə genişləndirilib. Aİ Xarici İşlər Xidmətinin rəhbəri Kaja Kallas bu barədə Yunanıstanın Kathimerini qəzetinə müsahibəsində bildirib.
“Avropa müdafiə yol xəritəsini müdafiə nazirləri ilə müzakirə edərkən biz dörd müdafiə layihəsini müəyyən etdik”, – Kallas bildirib. “Lakin heç bir məhdudiyyət yoxdur və buna görə də, məsələn, ilkin olaraq yalnız şərq cinahı üçün nəzərdə tutulan pilotsuz təyyarələrə qarşı divar indi bütün Avropaya şamil edilir, çünki dronlar hər bir region üçün problem yaradır, kommersiya uçuşlarına mane olur və Avropa hava limanlarında problemlər yaradır”.
Oktyabrın sonunda Aralıq dənizi Qrupu liderlərinin Sloveniyada keçirdiyi mətbuat konfransında Yunanıstanın baş naziri Kiriakos Mitsotakis vurğulamışdır ki, Avropa İttifaqına təhdidlər təkcə şərqdən deyil, həm də cənubdan gəlir və Aİ üzv ölkələrin xarici sərhədlərini qorumaq imkanlarına malik olmalıdır.
“Dron divarı” layihəsi Almaniya, Polşa, Finlandiya və Baltikyanı ölkələr arasında Rusiya ilə sərhəddə pilotsuz uçuş aparatlarına qarşı çoxqatlı monitorinq sistemi və avtomatlaşdırılmış müdafiə sistemlərinin yerləşdirilməsinə yönəlmiş birgə təşəbbüsdür. Layihə hazırda inkişaf və prototip seçimi mərhələsindədir. (Tass)