Kuba, çətin vəziyyətlərə baxmayaraq, Rusiya ilə birgə layihələr və müqavilələr həyata keçirməyə davam edəcək. Bu barədə Kubanın xarici işlər naziri Bruno Rodriges Parrilla Moskvada Rusiya xarici işlər naziri Sergey Lavrovla danışıqlar zamanı bildirib.
“Rusiya Federasiyası ilə Kuba Respublikası arasındakı münasibətlər tarixi, qardaşlıq, unikal və strateji xarakter daşıyır. Razılaşmalarımızın və layihələrimizin irəlilədiyini qeyd edirik. Və çətin iqtisadi mühitə baxmayaraq, əldə etdiyimiz razılaşmaları həyata keçirməyə davam edəcəyik”, – deyə o qeyd edib.
Rodriges Parrilla əlavə edib ki, “hər iki ölkə qlobal tarazlığa nail olmaq, beynəlxalq hüququn aliliyini və çoxtərəflilik prinsiplərini qorumaq üçün birgə işləməyə davam edəcək və həm Latın Amerikasında, həm də Karib dənizində beynəlxalq səviyyədə suverenlik və müstəqillik uğrunda mübarizə aparmağa davam edəcək, 2014-cü ildə Havanada Latın Amerikası bölgəsinin sülh zonası elan edildiyini unutmayacaq”. (Tass)