Latviya texniki səbəblərə görə Belarusla sərhədini bağlayıb və vətəndaşlarını evə qayıtmaq üçün alternativ yollardan istifadə etməyə çağırıb.
Baltikyanı respublikanın Daxili İşlər Nazirliyinin rəhbəri Yanis Dombrava açıqlamasında yazıb: “Texniki səbəblərə görə Latviya və Belarus arasındakı sərhəd bağlıdır. Hələ Latviyaya qayıtmayanlardan başqa yollardan istifadə etmələrini xahiş edirik”.
Belarus Dövlət Sərhəd Komitəsi Latviyanın sərhədi bağlaması ilə bağlı məlumatları təsdiqləməyib.
Nazir daha əvvəl Latviya vətəndaşlarını qonşu Belarusa səyahət etməkdən çəkinməyə çağırmışdı. Dombrava buna səbəb kimi Minskin iddia edilən hibrid müharibəsini göstərmişdi. Asiya və Afrikadan olan qanunsuz miqrantlar müntəzəm olaraq Belarus ərazisindən Latviyaya girməyə çalışırlar. Nazir belə bir şəraitdə “ölkələr arasında təhlükəsiz səyahət çətin ola bilər” deyə bildirib. (Tass)