Rusiya, bu cür xidmətlərə ehtiyac olarsa, Vaşinqton və Tehran arasında hərtərəfli uzunmüddətli sazişin bağlanmasına kömək etməyə hazırdır. Bunu Rusiyanın xarici işlər naziri Sergey Lavrov Primakov oxunuşları beynəlxalq elmi və ekspert forumunda bildirib.
Nazir qeyd edib ki, “Rusiya ABŞ və İran arasında hərbi əməliyyatlara son qoymaq üçün razılaşmanın əldə edilməsini dəstəkləyir. Biz davam edən danışıqları dəstəkləyirik. Bu iki ölkə arasında hərtərəfli, uzunmüddətli bir razılaşmanın hazırlanmasına və əlbəttə ki, əgər bizim xoşməramlı xidmətlərimizə ehtiyac varsa, qonşularının iştirakı ilə daha geniş bir razılaşma kontekstində kömək etməyə hazırıq”.
Lavrov əlavə edib ki, “Hörmüz boğazından sərbəst gəmiçiliyin bərpasının Qlobal Cənub ölkələrinin enerji və ərzaq təhlükəsizliyinə fayda verəcəyinə şübhə yoxdur. Fars körfəzində hərbi-siyasi vəziyyətin sabitləşməsi isə bütövlükdə Yaxın Şərqin bu strateji bölgəsində yeni təhlükəsizlik arxitekturası və əməkdaşlıq üzrə geniş dialoqun başlanması üçün bəhanə ola bilər”. (Tass)