Azərbaycan Milli Elmlər Akademiyasının Mərkəzi Elmi Kitabxanası (MEK) tərəfindən AMEA-nın müxbir üzvü, fəlsəfə elmləri doktoru professor Məqsəd Səttarovun biblioqrafik göstəricisi çapdan çıxıb.
MEK-dən AZƏRTAC-a bildirilib ki, görkəmli filosof-alimin elmi fəaliyyəti əsasən din və ateizm tarixi, ictimai şüurun qanunauyğunluqları, İslamın Azərbaycanın mənəvi-mədəni həyatındakı rolu və ictimai şüurun strukturu kimi mövzuları əhatə edir. Professor Məqsəd Səttarov 10 monoqrafiya, 4 kitab, 21 kitabça və 60-a yaxın məqalənin müəllifidir.
“Azərbaycan Respublikasının elm xadimləri” seriyası altında yeni tərtibatda nəşr olunan biblioqrafik göstəriciyə alimin həyatı, elmi-pedaqoji və ictimai fəaliyyəti haqqında qısa oçerk, həmçinin elmi əsərləri, dövri və seriyalı nəşrlərdə Azərbaycan və rus dillərində dərc olunmuş məqalələri barədə məlumat daxil edilib.
Vəsaitdə professor Məqsəd Səttarovun redaktə etdiyi kitablar, görkəmli elm və mədəniyyət xadimlərinin alim haqqında fikirləri, elmi rəhbəri və məsləhətçisi olduğu dissertasiya işləri barədə də məlumat öz əksini tapıb.
Görkəmli alimin 100 illik yubileyi münasibətilə tərtib olunan vəsaitin elmi redaktoru MEK-in direktoru texnika elmləri doktoru Hüseyn Hüseynov, redaktorları Biblioqrafiya şöbəsinin müdiri filologiya üzrə fəlsəfə doktoru Aytən Əliyeva və Elmi biblioqrafiya sektorunun rəhbəri Nərgiz Novruzova, tərtibçisi şöbənin əməkdaşı Natəvan Rəhimovadır.
Biblioqrafik göstərici fəlsəfə, din, ontologiya, qnoseologiya və etika sahəsində çalışan alim və mütəxəssislər, doktorantlar, ali məktəb tələbələri, həmçinin geniş oxucu kütləsi üçün nəzərdə tutulub.