Rusiyadan gələn hərbi texnika və yardım Madaqaskar Respublikasına göndərilib. Bu barədə ölkənin keçid prezidenti Mikael Randrianirinanın administrasiyası Facebook-da məlumat verib.
Bəyanatda deyilir: “Rusiyadan Madaqaskara hərbi texnika və yardım göndərilməsi bu gün İvatodakı General İsmael Mounibou Paraşütçülər Düşərgəsində rəsmi olaraq təhvil verildi. Bu, [Madaqaskarın] keçid prezidenti ilə Rusiya prezidenti Vladimir Putin arasında keçirilən görüşdən sonra iki ölkə arasında əməkdaşlığın təsdiqidir. Avadanlıqları tədbirə gələn keçid prezidenti polkovnik Mikael Randrianirina qəbul edib. Mərasimdə çıxış edən Silahlı Qüvvələr naziri Elie Maminirina Razafitumbou qeyd edib ki, “Madaqaskar ordusu üçün Madaqaskar sərhədlərinin təhlükəsizliyini gücləndirmək və Madaqaskarda sülhü qorumaq üçün zəruri olan bu avadanlığı almaq böyük şərəfdir”.
Administrasiya zirehli texnika, hərbi geyimlər, kiçik silahlar və müxtəlif sursatların alındığını dəqiqləşdirib. Bəyanatda Madaqaskar və Rusiya arasında hərbi əməkdaşlığın inkişafı, o cümlədən təcrübə mübadiləsi vurğulanıb. Yüksək səviyyəli təhlükəsizlik mütəxəssislərinin hazırlanması da nəzərdə tutulub.