Mühafizəkar siyasi fəal Çarli Kirkin öldürülməsindən sonra Tramp administrasiyasının yüksək vəzifəli məmurları təhlükəsizlik üçün hərbi bazalara köçməyə başlayıblar. Bu barədə “Atlantic” mənbələrinə istinadən məlumat yayıb.
Nəşrin qeyd etdiyi kimi, Kirkə sui-qəsd və ABŞ-da Trampın siyasətinə qarşı aktiv etirazlar, məmurlara və onların ailələrinə qarşı təhdidlər administrasiya rəsmilərini hərbi bazalara köçməyə sövq edib. Orada onlar hərbi müdafiəyə arxalana bilərlər.
Jurnalın məlumatına görə, dövlət katibi Marko Rubio, Pentaqonun rəhbəri Pit Heqset, daxili təhlükəsizlik katibi Kristi Noem, Hökumətin Səmərəliliyi Departamentinin (DOGE) sözçüsü Keti Miller və onun əri, Trampın daxili siyasət üzrə baş müşaviri Stiven Miller və ordu katibi Daniel Driskoll hazırda ABŞ hərbi bazalarında yaşayırlar. (Tass)