“Report” xəbər verir ki, bunu səhmdar cəmiyyətinin baş mühəndisi Namiq Yusubov jurnalistlərə açıqlamasında bildirib.

O qeyd edib ki, tikinti işləri mürəkkəb geoloji şəraitə malik ərazidə aparılacaq: “Həmin ərazidə birləşdirici tunellə yanaşı, yol infrastrukturu və mühəndis qurğularının tikintisi kimi mürəkkəb işlərin görülməsi də nəzərdə tutulur. Layihənin digər mühüm istiqaməti “Dərnəgül” elektrik deposunun tikintisinin tam başa çatdırılmasıdır”.

Metro rəsmisinin sözlərinə görə, depoda nəzərdə tutulan 25 qanovdan 12-si istismara verilib: “İstifadəyə verilmiş sahələrə 3 qaldırma və 9 təmir-baxış qanovu daxildir. Burada Yaşıl xətt üzrə qatarların gündəlik istismarının təşkili və texniki baxışının həyata keçirilməsi üçün lazımi şərait yaradılıb. Depoya aparan iki kilometrə yaxın yol inşa olunub, mühəndis-texniki qurğuların tikintisinə başlanılıb. Qanovlarda təmir işlərinin yüksək səviyyədə aparılması üçün işçilərə lazımi şərait yaradılıb. Deponun ikinci mərhələsinin istismarına başlanması ilə əlaqədar işçi heyətinin sayı artırılıb”.

“Deponun tikintisinin 2027-ci ilin sonunda – 2028-ci ilin əvvəlində tam başa çatdırılması planlaşdırılır. Tikinti işləri mərhələli şəkildə davam etdiriləcək və depo tam fəaliyyətə başladıqdan sonra Yaşıl xətt üzrə qatarların müstəqil istismarı üçün bütün imkanlar yaradılacaq”, – deyə N.Yusubov əlavə edib.