İsrailin heç bir hərbi məqsədi minlərlə uşağın ölümünə, bir milyondan çox fələstinlinin Qəzza zolağından məcburi köçkün düşməsinə və onların yaşadıqları humanitar böhrana haqq qazandıra bilməz. Bunu Yunanıstanın baş naziri Kiriakos Mitsotakis BMT Baş Assambleyasının 80-ci sessiyasında çıxışı zamanı deyib.
“2023-cü il oktyabrın 7-də baş verən dəhşətli hücumlardan sonrakı ilk gündən Yunanıstan İsrailin mövcudluq hüququnu inkar edən terror təşkilatına qarşı İsrailin özünümüdafiə haqqını dəstəklədi”, – Mitsotakis deyib. “Biz bütün girovların dərhal azad edilməsinə və atəşkəs elan edilməsinə çağırdıq. Lakin eyni zamanda açıq şəkildə bildirdik ki, heç bir hərbi məqsəd nə qədər vacib olsa da, minlərlə uşağın ölümünə, bir milyondan çox fələstinlinin Qəzza zolağından məcburi köçkünə çevrilməsinə və fələstinlilərin yaşadığı humanitar böhrana haqq qazandıra bilməz”.
Baş nazirin sözlərinə görə, Yunanıstan İsraillə strateji tərəfdaşlıq münasibətlərini saxlayır, lakin bu, onun açıq və dürüst danışmasına mane olmur. “Bu siyasətin davam etdirilməsi son nəticədə İsrailin öz maraqlarına zərər verəcək və beynəlxalq dəstəyin azalmasına gətirib çıxaracaq. Və mən bütün israilli dostlarıma vurğulamaq istəyirəm ki, onlar iki dövlətli həll perspektivinə xələl gətirən yola davam etsələr, qalan müttəfiqlərini özlərindən uzaqlaşdırmaq riski ilə üzləşəcəklər”, – baş nazir bildirib. (Tass)