Ermənistanın baş naziri Nikol Paşinyan hesab edir ki, İrəvan və Bakı arasında avqustun 8-də Vaşinqton razılaşmalarından sonra ölkəyə investisiya marağı artıb. Onun sözlərinə görə, indi Ermənistan tərəfi Avropa İttifaqının “Beynəlxalq Sülh və Rifah üçün Tramp marşrutu” (TRIPP) regional layihəsinə investisiya yatıracağını gözləyir.
Jurnalistlərə açıqlama verən Ermənistanın baş naziri Ermənistan və Aİ arasında strateji tərəfdaşlıq gündəliyinin imzalanmasını əlamətdar hadisə adlandırıb. O, bunu İrəvanla Brüssel arasında münasibətlərdə əhəmiyyətli dəyişiklik kimi qiymətləndirib. “İnvestisiyaya gəlincə, aydındır ki, avqustun 8-də Vaşinqton razılaşmalarından və hökumətin “Dünyanın kəsişməsi” layihəsinin bir hissəsi olan TRIPP layihəsinin elanından sonra Ermənistana investisiya marağı əhəmiyyətli dərəcədə artıb. Və təbii ki, biz Aİ-nin infrastruktur layihələrində konkret iştirakı və mövcudluğu ilə maraqlanırıq”, – Paşinyan bildirib.
“TRIPP çərçivəsində biz Aİ-nin konkret investisiya layihələrində iştirakını gözləyirik. Onu da qeyd etmək istərdim ki, biz TRIPP-in strateji çərçivəsini dəqiqləşdirmək, sənədlər üzərində işləmək üçün fəal işimizi davam etdiririk və deyə bilərəm ki, fikrimcə, biz yaxşı templə irəliləyirik. Təyin olunmuş müddət ərzində TRIPP-nin icrasını artıq görəcəyik”.
O qeyd edib ki, Ermənistanın Aİ ilə əməkdaşlığı regional nəqliyyat və infrastruktur layihələrindən kənara çıxır, lakin daha geniş kontekstə malikdir. Bununla bağlı Ermənistanın baş naziri xatırladıb ki, Aİ əvvəllər Ermənistana 2,6 milyard avro yardım ayırmaq niyyətində olduğunu bəyan edib. O, həmçinin əlavə edib ki, Ermənistanla Avropa İttifaqı arasında münasibətlər bundan sonra da dərinləşəcək və inkişaf edəcək.
Baş nazir Ermənistanın Şanxay Əməkdaşlıq Təşkilatına (ŞƏT) üzvlüyündə və Çinlə əlaqələrin dərinləşməsində də maraqlı olduğunu bildirib. (Tass)