Avropa liderləri ABŞ prezidenti Donald Trampın bu məsələdə qələbə qazanmasına imkan verəcək Qrenlandiyanın gələcəyi ilə bağlı razılığa gəlməyə çalışırlar. Politico diplomatlara istinadən xəbər verir ki, Aİ hərbi qarşıdurmanın NATO üçün fəlakətli olacağına inanır.
Onların sözlərinə görə, müzakirə Trampın ABŞ-ın adaya “ehtiyacı olduğu” və güc tətbiqini istisna etmədiyi barədə yeni açıqlamalarından sonra daha da şiddətlənib. Nəşrin mənbələri qeyd edib ki, Avropa liderləri Amerika lideri ilə qarşıdurma əvəzinə barışıq siyasətinə meyllidirlər, NATO daxilində Arktika təhlükəsizliyinin gücləndirilməsi və ABŞ-a təbii sərvətlərin çıxarılmasında güzəştlər kimi variantları nəzərdən keçirirlər.
Çərşənbə günü Danimarka xarici işlər naziri Lars Løkke Rasmussen və Qrenlandiya xarici işlər naziri Viviane Motzfeldt Ağ Evdə ABŞ dövlət katibi Marko Rubio və vitse-prezident J.D. Vance ilə görüşəcəklər.
ABŞ prezidenti Donald Tramp dəfələrlə Qrenlandiyanın ABŞ-a birləşməsinin vacibliyini bildirib. İlk səlahiyyət müddəti ərzində o, Qrenlandiyanı satın almağı təklif etmiş və 2025-ci ilin mart ayında onun ilhaq edilə biləcəyinə əminliyini ifadə etmişdir. Ağ Evin aparat rəhbərinin müavini Stiven Miller əvvəllər Danimarkanın adaya nəzarət etmək hüququnu şübhə altına almış və onun ABŞ-ın bir hissəsinə çevrilməli olduğunu bildirmişdi.
Qrenlandiya Danimarkanın muxtar ərazisidir. 1951-ci ildə Vaşinqton və Kopenhagen, NATO müttəfiqlik öhdəliklərinə əlavə olaraq, Qrenlandiya Müdafiə Müqaviləsini imzaladılar. Müqaviləyə əsasən, ABŞ adanı mümkün təcavüzdən qorumağı öhdəsinə götürdü.