İran və Oman birgə olaraq Hörmüz boğazından keçən yeni mərkəzi marşrut hazırlayırlar ki, bu da hər iki tərəfin maraqlarına cavab verir. Açıldıqdan sonra cənub və şimal marşrutları bağlanacaq. Bu barədə Press TV mənbəyə istinadən məlumat verib.
Daha əvvəl “Əl-Ərəbiyyə” televiziyası Hörmüz boğazında gəmiçiliyin tam bərpası ilə bağlı razılaşmaların yaxın saatlarda elan edilə biləcəyini bildirmişdi.
Kanalın mənbəyi bildirib ki, “Təklif olunan mərkəzi dəhliz praktik və hüquqi bir həlldir. Bu dəhliz işə düşdükdən sonra şimal və cənub marşrutları fəaliyyətini dayandıracaq”. Onun sözlərinə görə, bu addımlar sularda gəmiçilik qaydalarının dəyişdirilməsi zərurəti ilə bağlıdır və Hörmüz boğazının artıq İrana qarşı təzyiq vasitəsi kimi istifadə edilə bilməyəcəyini təmin edir.
Mənbə qeyd edib ki, ABŞ prezidenti Donald Tramp Məsqət və Tehran arasında gələcək razılaşmaya görə məsuliyyəti öz üzərinə götürmək məqsədilə İran və Oman arasında danışıqlar prosesinə müdaxilə etməyə çalışır, lakin onun cəhdləri yalnız razılaşmaya mane olur və onu gecikdirir. (Tass)